Hard — Rethink: ძველი L2Walker და გამოცდილება, რომელსაც ვაბრუნებთ

მოგესალმებით მოთამაშეებო!

Hard — Rethink-ზე რეალური L2Walker დაბრუნდება. ამასთან ერთად ვმუშაობთ საკუთარ დაცვაზე, რომელიც სერვერზე მხოლოდ მას დაუშვებს და სხვა ბოტ პროგრამებს დაბლოკავს. ამ გადაწყვეტილების უკან ჩვენი ბოლო ორი სეზონის გამოცდილება და დიდი ხნის სამუშაო დგას.

ბოტ პროგრამა პრედატორის Hard-ის კონცეფციის ნაწილია. ძველ პრედატორზე ეს გამოცდილება სწორედ L2Walker-ს ეფუძნებოდა: დაცვა მხოლოდ მას ატარებდა და სხვა ბოტ პროგრამებს სერვერზე არ უშვებდა. ბოლო სეზონებმა კიდევ ერთხელ დაგვანახა, რამდენად მნიშვნელოვანი იყო ეს მიდგომა.

რა ვერ გავითვალისწინეთ?

პირველი Hard-ის გახსნისას რეალური L2Walker არ გვქონდა. მის ნაცვლად მოთამაშეებს ალტერნატივები დახვდათ — L2Project, L2Adrenaline და Ingame Walker.

ბევრი თქვენგანი სწორედ ძველი Walker-ის მოლოდინით დაბრუნდა. ეს მხოლოდ ნოსტალგია არ ყოფილა: იცოდით მისი შესაძლებლობები, გქონდათ ნაცნობი კონფიგები და ის თქვენს საჭიროებებს პასუხობდა. ალტერნატივებმა ეს გამოცდილება სრულად ვერ ჩაანაცვლა და მოთამაშეების ნაწილმა თამაში აღარ გააგრძელა.

სხვა ბოტ პროგრამების გამოყენებამ ეკონომიკის მხრივაც შექმნა პრობლემები. მეორე სეზონზე ეს უფრო მძაფრად გამოჩნდა: მოთამაშეებმა უკეთ აითვისეს ამ პროგრამების შესაძლებლობები და უფრო რთული სკრიპტების გამოყენება დაიწყეს.

აქ პრობლემა მხოლოდ ავტომატური ფარმი აღარ იყო. სკრიპტებით შესაძლებელი ხდებოდა უფრო რთული მოქმედებების ავტომატიზაცია, რომელთა გავლენა სერვერის ეკონომიკაზე სულ უფრო რთული გასაკონტროლებელი ხდებოდა. სხვადასხვა პროგრამა სხვადასხვა შესაძლებლობას იძლეოდა და მხოლოდ წესების დაწერა ამ პრობლემას ვერ აგვარებდა.

ჩვენი შეცდომა იყო, რომ სერვერს ასეთი პროგრამებისგან შესაბამისი დაცვა არ ჰქონდა. ძველი პრედატორის გამოცდილება გვქონდა, თუმცა ბოლო სეზონებზე იმავე შეზღუდვის უზრუნველყოფა ვერ შევძელით.

რატომ ვერ დავაბრუნეთ Walker აქამდე?

მის დაბრუნებაზე პირველი სეზონიდან ვმუშაობდით, მაგრამ ძველი პროგრამის დღევანდელ რეალობაში გამართვა მარტივი არ აღმოჩნდა.

საჭირო იყო როგორც ჩვენს სერვერთან თავსებადობის მოგვარება, ისე ძველი კოდის განახლება და თანამედროვე Windows-ზე მუშაობის გამართვა. პრობლემები მხოლოდ სერვერთან დაკავშირებას არ ეხებოდა — ძველი ინტერფეისის ტექნოლოგიაც განახლებას საჭიროებდა.

ხანგრძლივი მუშაობის შემდეგ შევძელით კოდის განახლება და ძველი Walker-ის მუშაობის ლოგიკის შენარჩუნება. ინტერფეისიც განვაახლეთ, თუმცა მისი დიზაინი მაქსიმალურად მივუახლოვეთ ნაცნობ იერსახეს, რათა ძველი მომხმარებლებისთვის პროგრამასთან დაბრუნება ბუნებრივი ყოფილიყო.

რას ვცვლით Rethink-ზე?

ჩვენი მიდგომა ბოტ პროგრამებთან დაკავშირებით ასეთია: სერვერზე დაშვებული იქნება მხოლოდ L2Walker. L2Adrenaline, L2Project და სხვა ალტერნატივები დაიბლოკება საკუთარი დაცვის სისტემით, რომელზეც ვმუშაობთ.

ამით გვინდა შევზღუდოთ იმ რთული სკრიპტების გამოყენება, რომლებმაც წინა სეზონებზე ეკონომიკას პრობლემები შეუქმნა. ერთი დაშვებული პროგრამა ასევე გვაძლევს შესაძლებლობას, მისი ფუნქციონალი სერვერის წესებს მოვარგოთ.

წესების დაცვის ნაწილიც თავად Walker-ში იქნება გათვალისწინებული: ვმუშაობთ იმაზე, რომ მოთამაშემ ვერ ააწყოს ისეთი კონფიგი, რომელიც წესებს ავტომატურად არღვევს. შესაბამისი შეზღუდვა თავიდანვე პროგრამაში უნდა არსებობდეს, რათა ყველაფრის კონტროლი GM-ის მუდმივ ჩარევაზე აღარ იყოს დამოკიდებული.

ბოტინგის ნაწილში სწორედ ძველი პრედატორის გამოცდილებას ვუბრუნდებით. თავად თამაშს კი განახლება სჭირდება და ამ მიმართულებითაც ვმუშაობთ.

Remastered-ს თავისი, განსხვავებული ხედვა აქვს — იქ ბოტ პროგრამებს ადგილი არ ექნებათ. Hard-ზე კი ჩვენი ამოცანაა, მის კონცეფციას შესაბამისი Walker და დაცვა ჰქონდეს.

სწორედ ამას გულისხმობს Rethink: წარსულ გამოცდილებას გადავხედეთ, შეცდომებიდან დასკვნები გამოვიტანეთ და ახლა მათ გამოსწორებაზე ვმუშაობთ. L2Walker-ის დაბრუნება და სხვა ბოტ პროგრამების შეზღუდვა ამ პროცესის ერთ-ერთი მნიშვნელოვანი ნაწილია.